ಕವನ | ನಗುವಂತಾಗಿದೆ | ವೆಂಕಟೇಶ ಚಾಗಿ | naguvantagide | venkatesh chagi

 

**ನಗುವಂತಾಗಿದೆ**

ಬದುಕನ್ನೇ ತಮ್ಮೆಡೆಗೆ ತಿರುಗಿಸಿ 

ತಮ್ಮ ಪರಾಕ್ರಮದ ಶೌರ್ಯ ಸಾಹಸದ 

ಇತಿಹಾಸದ ಜಯವಿಜಯಗಳ ಬಗ್ಗೆ

 ಪಂಖಾನುಪುಂಖವಾಗಿ

 ಕೂಗುವ ಜನರ ಕಂಡು

 ಇತ್ತೀಚೆಗೆ ಏಕೋ ನಗುವಂತಾಗಿದೆ ||

 ಶಾಂತಿಯ ಸಾಗರಕೆ ತೂತುಕೊರೆದು 

ಕ್ರಾಂತಿ ಎಂಬ ಹುಚ್ಚು ಬೀಜಬಿತ್ತಿ 

ಶಾಂತಿಗಾಗಿ ಪರಿತಪಿಸುತಲಿ

ಶಾಂತ ಮನಸ್ಸುಗಳ ನಡುವೆ

ಅಶಾಂತಿಯ ಹರಡುವ ಜನರ ಕಂಡು

ಇತ್ತೀಚೆಗೆ ಏಕೋ ನಗುವಂತಾಗಿದೆ ||

 ಸತ್ತ ಜೀವಗಳ ತಪ್ಪು ಹುಡುಕುತ

 ಸುತ್ತಲೂ ಕತ್ತಲೆ ಎಂದು ವಾದಿಸುತ

ಬೆಳಕಿನ ಮನೆಯಲ್ಲಿ ಬೆಳಕನ್ನು ಹುಡುಕುತ್ತಾ

ಬೆಳಕಿನ ಬಣ್ಣಗಳಿಗೊಂದು ಧರ್ಮ ಕರ್ಮ

ಹುಟ್ಟು ಕುರುಡರಂತಿರುವ ಜನರ ಕಂಡು 

ಇತ್ತೀಚೆಗೆ ಏಕೋ ನಗುವಂತಾಗಿದೆ ||

ಮನೆಯೊಳಗೊಂದು ಮರವನು ತಂದು 

ಮರಕ್ಕೊಂದಿಷ್ಟು  ಎಲೆಗಳಂಟಿಸಿ

 ಕೃತಕವಾಗಿ ಗಾಳಿ ಬೀಸುತಲಿ

ನೆರಳಿನಲಿ ನೆರಳ ಹರಡಿಸಿ

ಹಸಿರೆಂದು ಉಸಿರಾಡುವ ಜ್ಞಾನಿಗಳ ಕಂಡು

ಇತ್ತೀಚಿಗೆ ಏಕೋ ನಗುವಂತಾಗಿದೆ ||

ಹುಟ್ಟುತಲಿ ಅಕ್ಷರಗಳನುಂಡು

ಹಗಲು ಇರುಳು ಪಠಣ ಮಾಡಿ 

ಮನೆ ಮಠಗಳ ಅಡವಿಟ್ಟು 

ಹೊಟ್ಟೆ ಕಟ್ಟಿ ಸುಟ್ಟು ಬೆಳೆದರೂ 

ಸುಖ ಕಾಣದ ಮನಸ್ಸುಗಳ ಕಂಡು

ಇತ್ತೀಚಿಗೆ ಏಕೋ ನಗುವಂತಾಗಿದೆ ||

=> ವೆಂಕಟೇಶ ಚಾಗಿ